March 18, 2008

أحاسيس متفرقة

Posted in Arabic, Reflections, Slang at 2:28 pm by Rou...

أول مرة أكتب بالعامية… معلش إستحملوني… أنا عندي قفلة في دماغي مخلياني مش عارفة أطلع أي حاجة… فما صدقت حاجة طلعت… فسبتها زي ما هي كدة… بالعامية…

 

 

أحاسيس متفرقة

 

 

كنت دايماً وإحنا راجعين من السفر باحبس نفَسي أوي وإحنا نازلين من على الكوبري بالعربية، وأنا بضحك أوي و مستمتعة جداً بالزغزغة اللي كانت بتجيلي في بطني ساعتها…

الحاجة الغريبة إني عمري ما عرفت أنا ليه كنت دايماً باربط الإحساس ده بالرجوع من السفر و مابحسوش في الأيام العادية… رغم يعني إنه الكباري مالية البلد…

وحشتني أحاسيسي الطفولية دي… أوي…

 

***

 

بابا وحشني أوي…

وحشتني ضحكة عينيه أوي…

ساعات كتير وأنا قاعدة في الliving room أسرح أوي في الكرسي بتاعه اللي جنب المكتبة البني و أحس إني شايفاه قاعد قدامي… وأبقى خلاص حبتدي أحكيله على موقف حصلي وعايزة آخد رأيه فيه… وفجأة أركز إن ماما قاعدة على الكنبة قدامي… فاكتم الدموع في عنيا وأخرج من الأوضة بسرعة قبل ما تاخد بالها… وأدخل أنام وأنا بادعي ربنا أحلم بيه… عشان ساعتها أقدر أتكلم معاه براحتي… وأصحى من النوم على وشي إبتسامة كبييييرة……

يا رب إجمعنا بيه في الجنة… آمييييين…

 

***

 

من كام يوم عديت على Bon Appetite اللي في شارع نبيل الوقاد في أرض الجولف بعد الشغل… المكان ده أنا بروحه بقالي حوالي 15 سنة… من ساعة ما فتح تقريباً… بس أغلب الوقت كنت باخد الحاجة take away … المرة دي حسيت إني عايزة أقعد… فقعدت… تقريباً كل الstaff هناك عارفني… في منهم بيشتغلوا في المكان من يوم ما فتح، دول بقى يعرفوني من وأنا عندي 12 سنة… في واحد منهم بالذات كان دايماً يغلط في عمري… وأنا في ثانوية عامة كان يكلمني على إني في إعدادية… و أنا في الجامعة يقول لي أخبار ثانوية عامة إيه… المرة دي لقيته بيقولي إنتي بتدرسي في أنهي جامعة… قلت له حرام عليك ده أنا متخرجة بقالي 4 سنين… ضحك و قالي أعملك إيه بس مانتي شكلك زي مانتي بقالك عشر سنين… و مشي… و سابني مع أحاسيسي و أفكاري…

إحساس غريب أوي إن الناس دي شافتك فعلاً وإنت بتكبر… في كل مراحلك العمرية… حطيت نفسي مكانه كدة و فكرت إني من كام يوم حسيت نفس الإحساس وأنا داخلة من باب العمارة عندنا لما قابلت ولد جارنا و تقريبا معرفتوش… الولد ده – و ياللسخرية – كنا رحنا زرنا مامته لمل إتولد… دلوقتي عنده حاجة بتاعت 15 سنة… حسيت ساعتها إني شاهد عيان… وإن بجد العمر بيعدي…

إحنا بنكبر ولا إيه………

 

***

 

رجعلي إحساس الNostalgia تاني… بس جامد أوي المرة دي…

وأنا رايحة الشغل الصبح خطرت على بالي حاجة و من غير ما أفكر كتير حطيتها موضع تنفيذ… غيرت إتجاه عربيتي و دخلت في الشوارع الجانبية الضيقة لأرض الجولف لحد ما وصلت لشارع بعينه و ركنت… نزلت من العربية و مشيت شوية لحد ما وقفت قدامها…

…مدرستي…

مشيت ناحية الباب الرئيسي وأنا بقدم رجل وأأخر التانية… جوايا مزيج عجيب من أحاسيس كتير متناقضة…

عبرت البوابة و تلقائيا بصيت شمالي وأنا داخلة وأنا بتمتم… الله يرحمك يا عم بدر… أنا عارفة إنه توفى من كام سنة… بس لما تدخل المكان اللي كان دايماً قاعد فيه و ماتلاقيهوش… تضايق كدة…

الغريب في الموضوع إن إحنا كنا كلنا بنخاف من عم بدر وإحنا صغيرين… كان عنده شنب أبيض كبير كنا مسمينه شنب النجعاوي…….. الله يرحمه……….

عديت المدخل و عديت معاه ذكرياتي  و عنيا بتلف علي كل التفاصيل من حواليا… تفاصيل صغيرة كانت في يوم من الأيام هي حياتي كلها… وأنا بدندن “…This used to be my playground… This used to be my childhood dream…”

دول غيروا لبس المدرسة… فكرت وأنا براقب طابور الصباح من بعيد…

مش كل المدرسين لسة موجودين… في كتير سابوا المدرسة…

كملت رحلتي العجيبة جوة عالم تاني من الذكريات… وشوش مألوفة…  وعيون تضحك لما تشوفني…

يا ترى إيه إحساسهم لما يشوفوا حد كانوا بيدرسوله من سنين طويلة وقد أصبح فجأة إنسان ناضج و مسئول و ناجح… أنا لو مكانهم ححس بالفخر لأني من جوايا حبقى دايماً واثقة إني بصورة أو أخرى سبت أثر في حياة الشخص ده…

من كام  سنة قابلت مدام ليلى مدرسة الفرنساوي في الشارع وسلمت عليها… هي ما عرفتنيش… و مافتكرتنيش… بس كان في عنيها نظرة سعادة مش قادرة أنساها أبداً…

شفت نفس النظرة دي في عيون كتيرة النهاردة…

أنا مبسوطة أوي…

 

 

 

بس كدة…

 

 

رحاب رجائي

في 18 مارس 2008

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: