June 24, 2008

من القدس لبغداد… يا قلبي لا تحزن

Posted in Arabic, Books - Fav. Selections, Revolutionary and Politician, Short Story at 11:11 pm by Rou...

بيقول عمنا نجيب محفوظ: آفة حارتنا النسيان!

 

الحارة هي الشارع، والشارع هوه الناس، والناس يعني الوطن، والوطن كله يا عم بينسى، عمره ما اتعلم حاجة من التاريخ، عمره ما افتكر حكاية، زي حكاية جحا والرومي.

 

أصل جحا كان عنده بيت كبير وفي وسط البيت شجرة جميز عتيقة كان غرسها جده السابع، جحا الأول، الشجرة كانت كبيرة قوي، وكانت عاملة تحتها ضلة قد البيت نفسه، كان أجداده بيقعدوا تحتها، يتقابلوا ويحلوا مشاكلهم، ومشاكل الناس ويكرموا الضيوف تحتها، ويتلقوا العزا ويعملوا الأفراح برضه تحتها، وفي أيام الصيف بيقعدوا في ضلها يتسامروا. و لكن جحا هجر الضلة اللي تحت الشجرة لسبب مجهول، يمكن انشغل بحاجات تانية أهم، يمكن حب البيت أكتر من الشجرة، ويمكن عنده حساسية من الجميز! الله أعلم.

 

وفي يوم من الأيام طب واحد رومي على جحا وقال له: صباح الخير يا سي جحا، أنا كنت صاحب أبوك الله يرحمه، وكان سايب لك عندي أمانة. خير والدنيا بخير، أهو رومي مش من بلدنا لكن عنده أمانة وأخلاق. الرومي بربش بعنيه وقال له: أنا كنت سالف مبلغ 100 دينار دهب من أبوك الله يرحمه، خد أهم وحل رقبتي من الدين، أصل الدنيا كلها ما تغنيش عن الآخرة. جحا قال له: مظبوط، أخذ جحا الفلوس حطها في جيبه وسلم على الرومي، ونزل جحا للسوق، اتسوق ورجع البيت، العيال أكلوا وأم العيال أكلت، ولما سألته عن الفلوس قال لها كنت مسلف واحد قرشين أيام العز. الراجل عنده أمانة رجعهم، الدنيا بخير.

 

نام جحا وشخر ولما الشمس طلعت لقى الرومي واقف على بابه من بدري. الله! يمكن أبويا كان مسلفه أمانة تانية؟! صباح الخير يا سي جحا، خير، أصل بين البايع والشاري يفتح الله، واللي يتكسف من بنت عمه ما يجبش منها عيال. جحا قال له: واللي يتجوز أمي أقول له يا عمي، و5 و5 عشرة، و6 و4 عشرة، والرجولة أدب مش هز كتاف، هات من الآخر عاوز إيه؟ الرومي قال له: أنا عاوز أشتري الضلة اللي تحت شجرة الجميز بتاعتك. حلو! ده زبون سقع وباين عليه أهبل، وكمان أنا حاعمل إيه بالضلة! بكام تشتري؟ الرومي قال له: 5000 دينار دهب سلطاني، جحا قال له: وأنا بعت لك، ناولني الفلوس، الرومي قال له: لأ، نكتب عقد عند القاضي الأول. وماله!

 

كتبوا العقد عند القاضي وجحا قبض الفلوس ونزل السوق واتشبرق، اشترى هدوم جديدة له وللعيال، ولحمة وسمك وفاكهة وبعيد عن السامعين خمرة معتقة، أكل وشرب وحلى وصلى ونام. لما الصبح صبح جحا لقى الرومي قاعد تحت شجرة الجميز في الضلة وفي صحن البيت. جحا سأله: بتعمل إيه عندك؟ قال له: قاعد في ملكي. ولما الشمس تروح؟ أمشي على طول، مافيش مشكلة.

 

تاني يوم الضهر جحا لقى الرومي قاعد على المصطبة قدام باب البيت، جحا سأله: بتعمل إيه عندك؟ الرومي قال له: الضلة جت على المصطبة. ولما الضلة تروح؟ قال له: أمشي على طول، مافيش مشكلة. في اليوم التالت جحا لقى الرومي جايب مراته وولاده وبيفطروا في البلكونة، وقبل ما جحا ينطق الرومي قال له: الضلة جت هنا. اللهم طولك يا روح، مافيش مشكلة.

 

رابع يوم الروم كتروا بقوا 50 وبعدين 100 وكلهم قاعدين في الضلة اللي اشتراها الرومي، من البلكونة لصحن البيت للمصطبة مستنين، وأول الضلة ما دخلت البيت دخل الأروام بيت جحا نفسه وقعدوا، وجحا خلاص بطل يسأل، كل يوم على ده الحال، يفطروا هنا، ويتغدوا هناك، يناموا ويتسامروا ويضحكوا في الضلة، لحد جحا ما زهق، ميت رومي عنده كل يوم من طلوع الشمس لغيابها.

 

جحا أخذ بعضه وراح للرومي وقال له: بين البايع والشاري يفتح الله، واللي يتكسف من بنت عمه، الرومي قال له: ما يجبش منها عيال، طلباتك؟ جحا قال له: تشتري البيت نفسه، أنا عايز أسيب البلد وأمشي، الرومي قال له: 100 دينار. ميت دينار يا كافر ليه هو أنا سارقه! الرومي قال له: بين البايع والشاري يفتح الله، عليه العوض… هات.

 

كتبوا العقد عند القاضي وقبض جحا الفلوس، لم حاجته وخد عياله وودع حيطان البيت، وخرج للطريق مولاي كما خلقتني.

 

لما رحل جحا لبغداد لقى الأروام شاريين الضلة هناك، ولما رحل على القدس لقاهم برضه شاريين الضلة هناك، ومش عارف جحا حيلاقيهم تاني فين… أصل الأروام في الأساس تجار ضلة!

 

بيقول عمنا نجيب محفوظ: آفة حارتنا النسيان!

 

 

 

— من كتاب “نوستالجيا” ل “محمود أبو دومة”

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: