January 17, 2011

في أمل…؟

Posted in Arabic, Reflections, Revolutionary and Politician, Slang at 2:07 pm by Rou...

أنا حقيقي مش عارفة أبتدي منين و لا أكتب إيه… ماهو أصل في أحاسيس ما بتتوصفش… بقالي كام يوم كل ما أمسك القلم عشان أكتب ماعرفش… بس كل اللي انا عارفاه إن قلبي كان حقيقي هيقف من الفرحة…

يمكن عشان عمري ما تخيلت إني هعيش وأشوف ده بيحصل فعلاً في بلد عربي… يمكن عشان طول عمرنا بنعتبر كلمات زي “إرادة الشعب” و “رغبة الجماهير” مجرد مصطلحات بتخدم أهداف سياسية لا بتقدم و لا بتأخر… يمكن عشان أنا كنت وصلت لمرحلة من اليأس والإحباط ماعدتش بيها قبل كدة… ويمكن عشان الدرس اللي التونسيين إدوهولنا كان عامل زي القلم على وشنا… بيوجع قوي… بس بيفوق قوي…


المذهل في الموضوع على رأي عمرو أخويا، إنه الواحد بيتابع الأحداث خطوة بخطوة… بيشوف الناس وهي نازلة… بيشوف التخبط و الضعف في رد فعل الحكام… بيشوف هروب الجبان وطيارته و هي بتلف بذل عشان تدور على بلد تستقبلها… الواحد عايش وسط الأحداث مش بيقراها في سطر و نص في كتاب التاريخ في المدرسة… “حدثت إنقلاب شعبي في تونس الشقيقة و أطلق عليها ثورة الياسمين…”… و ده إحساس ماظنش إني عمري هنساه… إني عشت وشفت… إني فخورة قوي بالتوانسة و إني بغض النظر على إختلافاتنا معاهم و الجذب و الشد في ماتشات الكورة، ماملكش إلا إني أنحني إحتراما لرجولتهم و لثباتهم على موقفهم…


لكن على قد ما السعادة مالياني من ناحية، على ما الحزن مسيطر عليا على بلدي…
إحنا ليه كدة… ليه شاطرين قوي في الكلام و بس… لكن نعمل حاجة بجد… لأ… إمبارح باليل كنت بتفرج على العاشرة مساءً و كانت منى الشاذلي مستضيفة عبد المنعم سعيد رئيس مجلس إدارة جريدة الأهرام… من ضمن الحوار كان سؤالها ليه إنه هل ممكن إنه زي ما إنسياب الثورة في الخمسينات و الستينات كان من مصر للعالم العربي يبقى دلوقتي من تونس للعالم العربي…؟ رد عليها بمنتهى الثقة بمجموعة من الإختلافات بين تونس و مصر و بين الشعبين تخلي ثورة بالشكل ده مستحيل تحصل في مصر… المحزن في الأمر إنه كان على حق في حاجات كتير… و ده اللي مخليهم واثقين في نفسهم قوي و طايحين أكتر و كمان على الملأ…


أيام إضراب 6 إبريل 2008 كنت كتبت عن إن نجاح الإضراب من وجهة نظري كان في فكرة إنه الناس إتجمعت فعلاً على موقف واحد لأول مرة من سنين طويلة… يمكن التأثير الحقيقي ماكنش جامد لكن إنك تجمع الملايين على هدف واحد مشترك… ده أول الطريق… و ده اللي بيفرق الثورات الشعبية عن الإنقلابات العسكرية…


صديق عزيز مرة قاللي إنه مافيش حاجة حتتغير في مصر إلا لو الطبقة المتوسطة إتحركت… يعني لو نركز شوية و نفتكر “… حتى يغيروا ما بأنفسهم”… هتبقى أول خطوة… لو بصينا لورا على تاريخنا حنفهم…
ثورة 1919… حريق القاهرة في يناير 1952… إنتفاضة الحرامية زي ما السادات سماها 1977… دول حركات شعبية… سيبك بقة من الإنقلاب العسكري اللي بيتسمى ثورة 1952… و لا حتى حركة الأمن المركزي سنة 1986… الثورات الشعبية عادة بيفصل بينها حوالي 30 سنة… يعني إحنا ممكن اليومين دول يبقوا بتوعنا… ممكن نكون إحنا اللي هنبتدي الشعلة…


محمد أخويا حط الستيتس بتاعته على فيسبوك:


“مبارك يا أهل تونس… زين مشي…
عقبال ما تردوهالنا وتقولوا:
زين يا أهل مصر… مبارك مشي…”


مين عارف… مش بعيدة على ربنا…
شكراً شعب تونس العظيم على الدرس…


إيه… في أمل يا ست فيروز… في أمل…


رحاب رجائي
في 17 يناير 2011

Advertisements

7 Comments »

  1. Ahmad Badawy said,

    أنا فعلا بتابع أخبارهم و جواية مشاعر أكبر من انها تتوصف. أنا جسمي قشعر و أنا بتفرج على الفيديو ده.
    http://www.facebook.com/#!/video/video.php?v=134657683263471&oid=123929557670558&comments
    و أنا معروف وسط صحابي بإني متعصب جدا لمصريتي. و في بتقوللي انت عنصري. بس دلوقت أنا بقول: لو لم أكن مصريا لوددت أن أكون تونسيا

  2. Rou... said,

    حاجة جميلة قوي… ربنا يكملهالهم على خير

  3. Lost and Found said,

    كلام جميل المهم انتو هتعمو ايه؟؟؟؟الحرية ليها تمن يا ترى مستعدين تتدفعوه؟

  4. Rou... said,

    حاجة لطيفة قوي إنك بتتكلم بصيغة الآخر… كأن كام سنة فس إنجلترا يخلوك تتبري من مصريتك

    على أي حال أنا مقدرش أتكلم بلسان حد… لكن أنا عن نفسي بحاول من مكاني و حنزل يوم 25 لأول مرة في حياتي مظاهرة… يمكن نتيجتها ماشوفهاش… لكن على الأقل ححس إني مش ساكتة و مش سلبية…

    شكراً على تعليقك

  5. Lost and Found said,

    على فكرة ي رو لما اتكلمت بصيغة الأخر مقصدتش اني مش مصري أنا مصري و هفضل مصري…أنا قصدت كمدنيين انتو هتعملو ايه عشان احنا كمان نتحرك….و على فكرة انا كمان نازل يوم 25

  6. Rou... said,

    هو إنت في مصر؟

  7. Lost and Found said,

    جاي يوم الاتنين الصبح


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: