January 29, 2011

جمعة الغضب

Posted in Arabic, Reflections, Revolutionary and Politician, Slang at 8:18 pm by Rou...

أنا مانزلتش يوم 25 نفسه لأسباب حكيتها قبل كدة، تاني يوم حاولت أنضم لمظاهرتين في مدينة نصر الصبح و بالليل بس ماكانوش بيكملوا… لكن أنا اللي عايزة أحكي عليه دلوقتي هو جمعة الغضب يوم 28 يناير 2011… يوم فاصل في تاريخ مصر… التليفونات كانت محجوبة من الصبح و الإنترنت محجوب من الليلة اللي قبلها… مصر كانت معزولة تماماً و ده كان مخلينا كلنا عندنا إحساس دفين إن في مجزرة هتتم في اليوم ده… بس ماكانش ينفع ما ننزلش… في أوقات حتى الخوف بيفقد معناه…

المهم… الساعة 11 صباحاً تماماً إتقابلت مع مجموعة كبيرة من الأصدقاء قبل صلاة الجمعة في شارع الطيران في مدينة نصر، كنا كتير فابتيدنا نقسم نفسنا مجموعات صغيرة و نتمشى في الشوارع الخلفية لجامع رابعة عشان مانلفتش النظر على إتفاق إننا حنتقابل كلنا في الجامع وقت الصلاة… اللطيف في الموضوع إنه وإحنا في طريقنا للجامع كنت لازم تشوف حد تعرفه أو ما تعرفوش طالع من كل شارع جانبي مع نظرة بطرف العين ليها معنى واحد… إحنا كلنا طالعين نطالب بحقوقنا… عارفين فيلم “الطريق إلى إيلات” لما وصلوا مطار الأردن و كانوا كلهم متنكرين في شخصيات تانية و كأنهم ما يعرفوش بعض لكن بينهم النظرة دي… وفعلاً و بمجرد السلام في نهاية الصلاة إنطلقت الهتافات… “الشعب يريد إسقاط النظام”… “يسقط يسقط حسني مبارك”… “تغيير… حرية… عدالة إجتماعية…” و غيرها كتير…


مشينا في طريق النصر لحد ما وصلنا لشارع يوسف عباس… كنا عايزين نوصل لصلاح سالم و منه لقصر العروبة… هنا إبتدى الأمن يصد و كانت أول تجربة مع القنابل المسيلة للدموع… إبتدى العنف لكن الناس كانت مصرة تعدي بأي تمن… و قدام إصرار الناس إبتدى الأمن يرجع لورا و يسبقنا على صلاح سالم… لما وصلنا لصلاح سالم كانوا مقفلين الناحية اليمين تماماً عشان ما نحاولش نروح ناحية قصر العروبة… لما كنا بنقرب قوي من الأمن كانت الهتافات بتدوي “سلمية… سلمية” و كنا بنصقف لأي عسكري أو ضابط موجود… و لما العنف إبتدى كنا بنحاول نفكر الناس دي إن إحنا مصريين زينا زيهم و الهتافات تعلى “يا عسكري قول الحق… إنت مصري و لا لأ…”


مشينا في صلاح سالم في حراسة الأمن المركزي من غير ما يتدخلوا… و إحنا ماشيين كان الناس في البلكونات و العمارات بيهللولنا و علم مصر طالع من كل شباك… كانوا بيحدفوا لنا مياه و تمر… كل شئ كان جميل… وحضاري… حاجة رائعة… عند العباسية إنضمت معانا مظاهرة جامع النور… ولما كنا ننادي على الناس اللي ماشية عادي في الشارع أو واقفة بتتفرج علينا ب “إنزل… إنزل” أو “يا أهالينا… ضموا علينا” وتلاقي الناس نزلت فعلاً وإنضمت لك كان بيبقى الإحساس خرافي… و لما وصلنا شارع رمسيس كان العصر بيأذن… مش قادرة أوصف جمال و بهاء المنظر… آلاف من المسلمين بيصلوا جماعة و من وراهم آلاف من المسيحيين بيحرسوهم من أي تدخل من الأمن المركزي… كانت أول مرة نقف من أول ما إبتدت المظاهرة من رابعة… و كانت أول مرة أقف و أستوعب العدد قد إيه… حاجة خيالية… أياً كان الإتجاه اللي تبص فيه تلاقي حواليك بشر بيجمعهم أمل واحد و هدف واحد و هو التخلص من النظام الفاسد…


لكن للأسف… زي ما حصل يوم 25 فجأة الآية إتقلبت و العنف إبتدى… في لحظة معينة ما بين رمسيس و التحرير إبتدى سيل من القنابل و الرصاص… في الدقيقة الواحدة تلات قنابل مسيلة للدموع… ماكناش شايفيين قدامنا بجد… نغسل عينينا ببيبسي زي ما إخواتنا التوانسة نصحوا و قبل ما نرجع نشوف تاني تترمي قنبلتين تلاتة… ماتبقاش عارف و لا قادر تتنفس… للأسف الشديد أنا ماقدرتش أعدي المنطقة دي و روحت… لما وصلت البيت حوالي الساعة 7 عرفت إن الجيش نزل و إن في حظر تجوال بادي من الساعة 6…


نزول الجيش بيقول إن في أمل… الجيش المصري نضيف… تاريخه نضيف…


أنا روحت لكن أخويا كمل ووصل للتحرير و لحد الساعة واحدة صباحاً ماكناش نعرف عنه حاجة لأن التليفونات كانت مقطوعة من الصبح و لما رجع أخيراً حكالنا على الأهوال اللي حصلت هناك… من رصاص مطاطي و قنابل مسيلة للدموع لعربيات متولعة و رصاص حي… أسرى من الأمن المركزي يهربوهم عشان الناس ماتضربهمش و محاولات لسرقة المتحف المصري يقفولها… حرب حقيقية إنتصر فيها الشعب إنتصار ساحق…


يوم 28 يناير مصر إتولدت من جديد…
أنا إتولدت من جديد…


أنا عندي أمل…عندي أمل…


رحاب رجائي
في 29 يناير 2011

Advertisements

4 Comments »

  1. Dina Ramadan said,

    اكتر اسم كان على بالى يوم الجمعة كنتى انتى يا رحاب
    كنت متأكدة انك هتنزلى ومش هتستسلمى زى يوم 25

  2. Rou... said,

    الله يخليكي يا دينا… الحمد لله نزلت… و حفضل بدافع عن اللي أنا مؤمنة بيه للآخر إن شاء الله

  3. Dina Ramadan said,

    ربنا معانا كلنا
    ربنا مع مصر

  4. Rou... said,

    آمين يا رب


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: