January 31, 2011

أيام الغضب

Posted in Arabic, Reflections, Revolutionary and Politician, Slang at 11:24 pm by Rou...

هو كل اللي حصل ده بجد حصل…؟
سؤال بسأله لنفسي كل دقيقة مش كل ساعة و لا كل يوم…
الأحداث ماشية بسرعة مفزعة…


النهاردة 31 يناير، كدة يبقى بقالنا سبع أيام من بداية الثورة يوم 25 يناير اللي فات…
بكرة إن شاء الله المفروض المسيرة المليونية… العدد دلوقتي في ميدان التحرير – اللي يمكن لأول مرة يبقى إسم على مسمى – وصل لقرب النص مليون… أنا لسة مش عارفة إذا كنت هقدر أنزل بكرة و لا لأ لإن أمي أعصابها تعبانة جداً و مش عايزة أسيبها في البيت لوحدها، أتمنى إني أقدر… لكن على الأقل في الوقت الحالي أنا عايزة أسجل أحداث الأيام اللي فاتت… ما بعد جمعة الغضب، 28 يناير…


زي ما حكيت قبل كدة، أنا رجعت يوم 28 الساعة 7 تقريباً و عرفت بعد ما رجعت إن الجيش نزل و إن في حظر تجول من الساعة 6 لحد 7 الصبح… من يومها بالليل بدأت سلسلة من المهازل اللي لسة عايشينها حتى لحظة كتابة هذه السطور…


قبل النزول الكامل لقوات الجيش، الداخلية سحبت كل قواتها… لأ أنا مش بتكلم على أمن الدولة و الأمن المركزي… أنا بتكلم على الشرطة العادية و حتى المرور… في صورة غير مفهومة بالمرة… و في نفس اللحظة و بدون أي مقدمات البلطجية ملوا الشوارع و إبتدى الشغب… الأكتر من كدة بقة إنه اليوم اللي بعدها مباشرة بدأت عمليات سرقة و نهب و ترويع للناس في بيوتها و اللي في خلال ساعات إتعرف إن معظم اللي كان بيتقبض عليهم من حاجة إسمها الشرطة السرية… وفجأة و بالصدفة أربع سجون يهرب منهم المساجين… ليه…؟ و لمصلحة مين…؟ اللي حصل ده تآمر من الأمن… الكلب حبيب العادلي ده لازم يتحاكم محاكمة عسكرية بتهمة الخيانة العظمى…


لكن أنا برده مش هو ده اللي عايزة أتكلم عنه… أنا زي ما إتكلمت عن روعة الشعب المصري أثناء التظاهر لازم أتكلم عن الوعي غير المسبوق اللي عند المصريين… بجد… أنا ماشوفتش كدة في حياتي… إزاي الناس بدون أي إتفاق مسبق عملوا كل اللي ممكن يتعمل عشان البلد ماتدمرش… كل واحد بيعمل اللي يقدر عليه في المكان اللي هو فيه و الوقت المناسب… شعب عظيم… يشيع شهداؤه… و ينظم مروره… و يشكل لجان شعبية لحماية ممتلكاته… و يتظاهر… و يصر على موقفه و يحتشد على مدار 7 أيام… يعني من الآخر زي ما المصري اليوم سماه “الشعب في خدمة الوطن”…


النقطة التانية اللي عايزة أتكلم عنها هي العند و الكبر…
إزاي الراجل ده جواه كل العند و الكبر ده… من أول يوم 25… تجاهل تام و بعده إستفزاز من كلاب النظام أمثال صفوت الشريف و أسامة سرايا…
كل الخطوات اللي إتاخدت متأخرة مليون سنة…
و في الآخر يطلع يوم الجمعة الساعة 12 و نص بالليل يقول أنا بحل الحكومة و كلام فارغ من عينة “فهمتكم فهمتكم” بتاعة بن علي… و حتى قراره تاني يوم بتعيين نائب رئيس لشخص أنا شخصياً بشوفه صورة من مبارك بتاريخ مش نضيف أبداً في الملف الفلسطيني الإسرائيلي… عمر سليمان رئيس المخابرات العامة…


الصورة دلوقتي مش واضحة…
الجيش أعلن إن مطالب الشعب شرعية… و بعدها طلع عمر سليمان يقول كلام فيه رسالة واضحة إنه مبارك قاعد قاعد…


نظام عنيد… و شعب أكثر عنداً…


يا ترى الطيارة الورق هتقدر تطير وسط الطيارات ال إف 16 في سماء مصر…؟
يا ترى هييجي يوم نقول فيه إن كل اللي فات أصبح ماضي… ؟
أتمنى…
على كل حال… يا رب بكرة يمر على خير…


رحاب رجائي
في 31 يناير 2011

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: