February 10, 2011

الشارع لنا

Posted in Arabic, Reflections, Revolutionary and Politician, Slang at 11:41 pm by Rou...

17 يوم عدو من بداية الثورة…
الناس مشحونة على الآخر تحضيراً لمسيرة مليونية بكرة…
أسبوع الصمود بيخلص… و الواحد مش عارف الأمور هتوصل لإيه…
عمر سليمان بان على حقيقته تماماً في اليومين اللي فاتوا بالذات بتصريحاته الوقحة إن الشعب المصري لسة مش مستعد للديموقراطية…
العصيان المدني اللي أنا كنت بقول صعب يتعمل إبتدى بالفعل في محافظات كتيرة عن طريق إضرابات العمال في المصانع… أكيد ده هيكون ورقة ضغط كبيرة على النظام…
 
في نص اليوم حصلت مفاجأة… المجلس الأعلى للقوات المسلحة إجتمع ودي حاجة ما بتحصلش إلا في حالة الحرب، بس المفاجأة كانت إنهم إجتمعوا من غير مبارك اللي هو المفروض القائد الأعلى للقوات المسلحة… لما الجيش طلع بيانه رقم 1 اللي بيه قال إنهم هيفضلوا مجتمعين لبحث الموقف كل التحليلات قالت إن ده معناه إنقلاب من الجيش… و لما التلفزيون المصري أعلن إن في خطاب من مبارك بعد شوية كل التحليلات قالت إن ده خطاب التنحي…

ماكنتش نزلت الصبح لإني وصلت لمرحلة من الإجهاد عنيفة جداً… مش بنام و مش باكل و مجهود بدني و ذهني كان بيقوللي إني على وشك الإنهيار… أخويا الكبير كان نازل من دبي النهاردة يومين شغل…. لما وصل على الساعة 7 قلنا أكيد مش هنسمع خطاب التنحي في البيت، فنزلنا إحنا التلاتة على التحرير… الناس كانت كلها نازلة تحتفل… بس مش عارفة ليه كان عندي إحساس إن في حاجة غلط… بالذات لما طلعت تصريحات من أنس الفقي عن عدم نية مبارك للتنحي…


طبعاً زي كل مرة الخطاب إتأخر… ولما في الآخر طلع كانت الصدمة التانية…
كلام فارغ يقوله في عيد الأم… لأ و كمان بيستطرد في الكلام و يقولك “لقد كنت شاباً”… قاعدين ع القهوة أصلنا بنرغي مع بعضنا… ده حتى جملة التفويض قالها ع الماشي كدة… بجد مش قادرة أصدق… هو بجد أنهي جزء في “إرحل” مش فاهمها… هو لازم للآخر تخلي شكلك بالسوء ده…؟ مش كفاية عليك 30 سنة ذل فينا…؟


بس عامة بكرة النهاية… و لو مش بكرة يبقى بعده و بعده… بكرة بجد مصر كلها هتنزل الشارع… ومش هترجع إلا لما هو يمشي… إحنا ما بقناش كام مليون إحنا بقينا مصر كلها… و مش هنكون بس في التحرير… لأ هنبقى في كل شارع و كل ميدان… هنروح ماسبيرو و هنروح قصر العروبة… هننزل كل حتة لحد ما يفهم…


بحبك يا مصر… و لو كان بكرة آخر يوم في عمري… ما بقتش فارقة…


بكرة… الشارع لنا…


رحاب رجائي
في 10 فبراير 2011

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: