February 18, 2011

ما بعد الحرية

Posted in Arabic, Reflections, Revolutionary and Politician, Slang at 11:04 pm by Rou...


فات أسبوع من الحرية… حلو تحقيق الأحلام مش كدة…؟
بس هل إحنا فعلاً حققنا أحلامنا…؟
في رأيي الشخصي لسة… سامعة حد بيقوللي حرام عليكم مش الراجل سابهالكو و مشي…؟
ممممم… ده حقيقي… لكن النظام لسة ماسقطش… رأس النظام رحل آه… لكن رموزه لسة…
فين صفوت الشريف و فتحي سرور و زكريا عزمي و عمر سليمان و مفيد شهاب و علي الدين هلال… و جمال مبارك نفسه… و غيرهم أسامي كتير…
الحزب الوطني لسة قائم… الناس دي وضعها إيه…؟ رياسة الجمهورية وضعها إيه…؟


بلاش كل ده… المعتقلين اللي ماخرجوش لحد النهاردة… وضعهم إيه…؟ قانون الطوارئ ليه مش بيتلغي لحد النهاردة…؟ إزاي واحد زي حبيب العادلي فضل كل ده من غير ما يتقدم للمحاكمة و في الآخر يتقدم للمحاكمة مش بتهمة الخيانة العظمى و القتل العمد للمتظاهرين ولكن بتهمة إهدار المال العام…؟ الوزارة اللي كلها من رجالة النظام بتعمل إيه…؟ و إزاي واحدة زي عائشة عبد الهادي اللي كانت بتبوس إيد سوزان مبارك على الملأ و لا أبو الغيط اللي لحد كام يوم كان بيقول إننا قلة مندسة و لا سامح فهمي اللي نهبها حتة حتة يفضلوا في الوزارة اللي هي المفروض لتسيير الأعمال…؟ وإزاي واحد زي أحمد شفيق لما يطلع في لقاء على الهواء يفضل يقول حركة 25 يناير ومش قادر حتى يعترف إنها ثورة… و لما يتسأل ليه فلوس آل مبارك ماطلبوش تجميدها في البنوك الغربية يقول ماجاتليش إشارة بكدة و لما يتسأل مستني إشارة من مين يقول معرفش… أمال مين اللي يعرف يا معالي رئيس الوزراء…؟ وإشارة إيه اللي مستنيها ومن مين…؟


من شوية جاتلي رسالة على الفيسبوك بتقول الآتي: النائب العام يبقى إبن خالة وزير الداخلية الجديد محمود وجدي… و زوجة أحمد شفيق تبقى عمة خديجة مرات جمال مبارك… و إبن الفريق أحمد فاضل رئيس قناة السويس متجوز بنت عمر سليمان… ومرات حبيب العادلى تبقى طليقة أشرف السعدى صاحب شركات السعد لتوظيف الأموال سابقاً والمقيم حاليا بلندن بعد هروبه ليها سنة 59…


دي عصابة… والله العظيم عصابة… لسة بتسألوا مين اللي سرق مصر…؟ قدامكم أهم… حاكموهم…!


أنا بعتذر مقدماُ على التشبيه اللي هقوله…
لكن إحنا عامليين زي اللي كان عنده دمل كبيييير… مش معنى إن إحنا فتحناه إنه خلاص كدة… لسة محتاجيين نطلع الصديد اللي بقاله 30 سنة متكون… محتاجيين ننضف مكانه… و بعدها نبتدي نعالجه عشان مكانه ده يتداوى…


أنا مش عايزة أتكلم كتير عن سيناريو الثورة المضادة لإن أعتقد إن بنسبة كبيرة معظم الناس بقت على دراية باللي ديول النظام بيحاولوا يعملوه… من أول يوم لما حسام البدراوي دعا إنهم يعملوا حزب جديد يتسمى حزب 25 يناير… أظن محدش مننا ماوصلتهوش الرسالة الواضحة إن ده هيكون حزب وطني جديد…


النهاردة كانت جمعة الإنتصار و الإستمرار… الناس في التحرير كانت قرب الثلاثة مليون… أنا شايفة إن دي حاجة كويسة جداً… إحنا عندنا ثقة في الجيش آه… لكن ماحدش ينكر إن في حاجات كتير فيها تباطؤ مش مفهوم… الهدف من تجمع النهاردة و أي تجمع تاني الفترة اللي جاية إننا نوصل للجيش رسالة إننا لسة مستنيين تحقيق باقي مطالب الثورة… المطالب اللي هم نفسهم وصفوها بالشرعية من أول يوم نزلوا فيه… سلاحنا الأول و الأخير هو تواجدنا في الشارع…


على فكرة، أنا مش بدعو إننا نوقف حال البلد… أنا كل اللي بقوله إن دي ورقة الضغط اللي نملكها… و اللي بيها وصلنا لكل اللي وصلناله ده… و من غيرها مافيش حاجة هتتحقق… زي ما واحد صاحبي كتب الستيتس بتاعته على فيسبوك: “قرار النائب العام بحبس العادلي وجرانة والمغربي وعز على ذمة التحقيق بعد تباطؤ واضح وعشية مليونية جديدة يبعث برسالة: تظاهروا وثوروا تجدوا ما يسركم… تخاذلوا مالكوش عندنا حاجة!”…


أظن الرسالة واضحة…


رحاب رجائي
في 18 فبراير 2011

Advertisements

2 Comments »

  1. Dina Ramadan said,

    يا رحاب اللى انا سمعته انهم لسه بيديروا البلد من شارم
    وان الوزراء لسه بيبعتوا تقاريرهم لهناك
    وان زكريا عزمى لسه فى مكتبه وبيمارس مهامه (كأن شيئا لم يكن)

    للاسف وبصراحة .. انا حسة انه بيضحك علينا والموضوع فيه تسويف جامد (لحين استعادة توازنهم)
    لازم يحصل زى ما حصل فى تونس وتتغير الوزرارة
    بالكامل و المحافظين

  2. Rou... said,

    بجد دي مهزلة… أنا سمعت الكلام ده برده…
    مش فاهمة… طيب يعني نطلع في مظاهرةات في شرم يمكن يتهد و لا إيه!!!


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: