March 9, 2011

أمن الدولة… يا أمن الدولة

Posted in Arabic, Fav. Lyrics, Quotes, Reflections, Revolutionary and Politician, Slang at 6:06 pm by Rou...

في أول أيام الثورة لما كنا بننزل المظاهرات كان من ضمن الهتافات اللي بنقولها: ” أمن الدولة يا أمن الدولة… فين الأمن و فين الدولة”… يوم الجمعة اللي فاتت الهتاف إتحول ل: “أمن الدولة يا أمن الدولة… إحنا الأمن و إحنا الدولة”…

أمن الدولة…
الجهاز الأمني المرعب اللي المفروض يكون حامي حمى الوطن و لكنه تحول إلى قاهر و مذل للشعب… الجهاز اللي نشأ عشان يطارد الإرهاب و لكنه تحول إلى منظومة لإرهاب الشعب… واللي أصبح دولة جوة الدولة لا ترى إلا نفسها و لا تسمع إلا صوتها… الحاكم و المتحكم الأول و الأخير في كل شئ في مصر…

يوم 5 مارس 2011 بدأت إسكندرية الطريق لإسقاط أمن الدولة بتظاهرات عنيفة جداً عند المقر الرئيسي هناك عشان كلاب الدولة كانوا بدأوا يحرقوا مستنداتهم (واللي طبعاً بالصدفة البحتة حصل تاني يوم ما حكومة شفيق إتحلت)… بعدها القاهرة وباقي المحافظات بدأوا التظاهر و الهجوم على مقراته يوم 6 مارس و أسقطوه تماماً (أو هكذا هيأ إلينا) يوم 7 مارس بسيطرة الجيش على مبنى لاظوغلي…

أول حاجة جات في بالي و أنا بدخل مبنى مدينة نصر الأسطوري اللي طول عمرنا بنطلق عليه الباستيل من كتر الحكايات و الروايات اللي بتتحكي عليه هي الآية دي: “فتلك بيوتهم خاوية بما ظلموا إن في ذلك لآية لقوم يعلمون”… كأنها إتقالت للمنظر اللي أنا شفته بالضبط… مكاتب فاضية و أوراق مرمية منها المفروم و منها اللي محروق و منها اللي زي ما هو…

كنت بلف في المكان و أنا مخي بيحاول يستوعب… الناس من حواليا كانوا بيحاولوا يعملوا المستحيل عشان يوصلوا لأبواب السجون السرية اللي طول عمرنا بنسمع عنها سواء في الباستيل أو لما رحت بعدها المبنى اللي قصاد جامع نوري خطاب… المبنى التاني ده صغير بالمقارنة بالباستيل ولكنه لازق فيه جنينة كبيرة طول عمرنا كنا بنسمع إن تحتها في أدوار من السجون و الزنازين… وإحنا هناك كنا بنشوف كل فتحة في الأرض ممكن تكون مدخل للأدوار اللي تحت كنا بنخبط على الحيطان عشان نسمع من وراها إذا كان في خواء و لا لأ… كنا هنتجنن…

لما روحت يومها بالليل فضلت صورة في خيالي للمعتقلين المحبوسين في السجون دي بتجيلي بنفس الإصرار اللي كانت صورة خالد سعيد بتطاردني بيه من أكتر من سنة… ولما سمعنا بعدها الأخبار إنهم عرفوا يوصلوا لمدخل سجن من السجون في الباستيل و خرجوا منه 14 بنت و 25 ولد، كنت خلاص بنهار… دول شياطين… أكيد مش بشر… ده شر مطلق…

لكن كل ده على جنب و اللي حصل اليومين اللي فاتوا و لسة بيحصل على جنب تاني خالص…
أنا قلت من شوية إننا أسقطنا أمن الدولة تماماً… أو “هكذا هيأ إلينا”… لإن الوقائع اللي حصلت ولسة بتحصل بتثبت إنهم لسة بيشتغلوا… و بقوة كمان…

من البداية خالص وأنا حاسة إن في حاجة غلط… السهولة اللي تم بيها الإقتحام… أنا لما رحت كان بالفعل الناس بتدخل… وماحدش عارف يحدد إزاي حصلت لحظة الدخول لكن كله بيجمع إنه كان سهل… و حتى بعدها… كل الأوراق اللي إتلقت ليها علاقة يا إما بالإخوان يا إما بناس إعلاميين أو مشاهير… مافيش ورقة واحدة عن كبار رجال النظام… ما فيش ورقة عن المعتقلين أو السجون… الناس دي تخلصت من الحاجات اللي تدينهم و سابولنا شوية عضم نعضعض بيه في بعض…

لحد هنا كنت لسة مش مستوعبة قوي اللي بيحصل… لحد إمبارح… لحد ما إبتدوا يلعبوا من تاني بنفس الورقة القديمة… سلاحهم الأخير… الورث القذر لنظام مبارك الحقير… الفتنة الطائفية…

أنا بس اللي هيجنني ومش قادرة أستوعبه هو إزاي الناس بالسذاجة دي… إزاي فعلاً بينفذوا الخطة المحطوطة لهم بالحرف… الطرفين على فكرة… ياخواننا حرام عليكم… ده إحنا قعدنا أيام طويلة مافيش ولا من قريب و لا من بعيد ربع حادثة حصلت… إيه… لحقتوا تنسوا شعارهم اللي شفناه بعنينا جوة مقاراتهم: “الإطمئنان الكامل أول مراحل السقوط”… بجد يا شماتتهم فينا…

لكن هرجع وأقول أنا برضه مقتنعة إن كل اللي بيحصل ده أكبر دليل إننا ماشيين في الإتجاه الصح… لو كنا ماشيين غلط ماكانوش هيحتاجوا يعملوا أي حاجة…

في يوم هتتنتهي أسطورتكم ياللي ماتعرفوش ربنا…

خليكوا فاكرين دايماً: “ولا بد من يوم معلوم تترد فيه المظالم… أبيض على كل مظلوم وإسود على كل ظالم”

رحاب رجائي
في 9 مارس 2011
Advertisements

4 Comments »

  1. Rehab Riad said,

    Well said ya Rou…

  2. Rou... said,

    thanks dear.. the more important that saying it is people to understand it.. i am still hopefull..

  3. Amani Saied said,

    Exactly ya Rehab! We r on the right track so far and *someone* wants now to shatter our unity and demonize certain figures for their own benefit. The possiblities for this someone being the ‘ancien regime’ or any other power is all the same. You cant imagine how important are honest & sharp accounts like yours in making things clear and documented for the future. Amn Dawla was not ‘bastille day’ like it might be reported, it was more like ‘fishy day’! God bless you

  4. Rou... said,

    Very true ya Amani, I just hope people would get what’s going on before it’s too late… I am still hopefull and believing that since God took us to where we are now, he will take us through it just like He did in the first days of the revolution… I am positive…

    Thanks dear for passing by, miss our talks 🙂


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: