March 19, 2011

مصر بتتغير… وإحنا كمان

Posted in Arabic, Reflections, Revolutionary and Politician, Slang at 9:14 pm by Rou...

من يوم السبت اللي بعد التنحي و أنا عايزة أكتب البوست ده، لكن ماكانش في وقت مناسب… فكرت كتير في عنوانه و مالاقيتش إسم مناسب أكتر من حملة المصري اليوم على التلفزيون… “مصر بتتغير وإحنا كمان”…

عارفين إحنا دلوقتي عاملين زي مين؟
زي اليابانيين بعد الحرب العالمية الثانية… أجيال كاملة إشتغلت و بنت بإيديها مستقبل أحسن لبلدها و لأجيال من بعدهم… ماكانوش مستنيين حاجة… و لا متوقعين إن هم اللي هيشوفه حصاد مجهودهم… عشان كدة و صلوا للي هم فيه (بغض النظر عن المأساة اللي اليابان فيها حالياً)…

قبل ما أبتدي عايزة أقول إني مش معمية عن المشاكل و السلبيات… أنا عارفة و متأكدة إن اللي جاي صعب قوي… و إن إحنا سكتنا طويلة قويييييي… و إن إحنا في الغالب مش هنشوف الحلو بجد بعنينا… بس مش مهم… عشان على الأقل إحنا عارفين إن إحنا بإيدينا دلوقتي بنبني حياة أفضل لأجيال تانية… بنكتب مستقبلهم بحاضرنا…

في النقاط اللي جاية ححاول ألخص اللي شفته الأيام اللي فاتت… يمكن تكون حاجات صغيرة… ولكن لما نحطها جنب بعضها بتعمل صورة جميلة لبلد أجمل…

– تاني يوم التنحي بدأت حملة لتنظيف البلد… كان عندي إحساس إن الموضوع ده هيكون بس في اليومين اللي في الأول عشان الحماسة اللي الثورة ضختها جوه دمنا… ولكن لدهشتي الشديدة من يومها لحد النهاردة و أنا كل كام يوم أشوف مجموعة شباب في الشوارع بينضفوا و بيدهنوا الأرصفة…

– رئيس مصلحة الضرائب كان في حديث مع ريم ماجد على أون تي في من فترة و كان بيحكي عن عدد غير مسبوق من ممولين بيدفعوا اللي عليهم… حاجة عمرها ما كانت بتحصل قبل كدة…

– يوم ما كنت بعمل تجديد الرخصة واحد جه وقف قدامي في الطابور… لسة بقوله بعد إذنك في طابور إبتدى يتكلم بطريقة غير محترمة… فجأة بدون أي مقدمات دخل 3 أشخاص في الحديث وأصروا إنه يرجع ورا لإن “مصر بتتغير”…

– قبل ما يطلع قرار إن التصويت في الإنتخابات هيكون بالرقم القومي رحت القسم عشان أعمل بطاقة إنتخابية… عارفين شفت إيه…؟ طابور طالع لبرة القسم في إنتظار دورهم للتقديم للبطاقة الإنتخابية…

– تاني يوم إقتحام مبنى أمن الدولة في مدينة نصر نزلنا أنا و صديقة عزيزة عشان نروح عند مبنى لاظوغلي… وإحنا في الطريق تاكسي كسر علينا و صديقتي فرملت فجأة فالعربية اللي ورانا خبطت فينا… وقفنا على جنب نشوف العربية… صاحب العربية اللي ورانا (كان معاه BMW) جالنا وسأل سؤال وحيد: “إنتو كويسين؟”… قلناله “آه… عربيتك حصل لها حاجة؟”… قاللنا “مش مهم في داهية المهم إنكم بخير”… و مشي… بس كدة…

– في نفس اليوم ده لما وصلنا التحرير و ركنا إكتشفنا إن موبايل صديقتي مش موجود… إتصلنا بالرقم فرد علينا واحد قاللنا إنه عامل النظافة اللي في الشارع مكان ما عملنا الحادثة وإن الموبايل معاه نعدي أي وقت ناخده… وخلص كلامه بكلمة واحدة: “ماتقلقوش… دي أمانة”…

– صديقة عزيزة حكت لي إن ميكروباص كسر عليها و لما وقفت جانبه و إتكلمت بهدوء إن مايصحش كدة سكت شوية و بعدين بصلها و قالها: “حقك عليا”…

– الكلاكسات والله العظيم قلت و الناس أوقات كتير جداً بقت بتعدي بعضها في الشوارع…

– إمبارح في صورة رائعة إنتشرت على فيسبوك لستيكر الداخلية عملته و بتحطه على العربيات اللي راكنة صف تاني بيقول: “كدة عيب.. البلد بتتغير وإنت واقف صف تاني”…

لكن كل اللي فات ده على جنب و اللي شفته الأيام اللي فاتت قبل الإستفتاء والنهاردة وإحنا في اللجنة على جنب تاني خالص…

– لأيام طويلة أصبح مافيش في مصر حديث إلا عن التعديلات المقترحة… ناس عمري ما كنت أتخيلهم يشتروا كتاب بقوا يحضروا ندوات لشرح التعديلات… في أي مكان تروحه تسمع آراء و أفكار و مقترحات و تفسيرات… بغض النظر عن إختلافك أو إتفاقك معاها… فكرة الوعي السياسي غير المسبوق اللي حصل عند المصريين… حاجة مذهلة…

– من كام يوم إتفقنا أنا و ماما نكلم كل قرايبنا نقولهم ينزلوا يوم الإستفتاء… كل أما نكلم حد يسبقنا في السؤال: نازلين و لا لأ؟… مش بس كدة… إبتديت لما أنزل الشارع أتكلم مع الناس… البوابين… سواقين التاكسي… بتاع العيش… بتاع الفول… عاملين في السوبر ماركت و الكافيهات… كله بيرد نفس الرد: “طبعاااااً هروح… ده أنا ليا صوت!”…(ييجي نظيف و عمر سليمان يشوفوا الشعب اللي لسة مش مستعد للديموقراطية!!)

– النهاردة وإحنا في اللجنة… وصلنا أنا و ماما الساعة 8 صباحاً… مش قادرة أوصف الطابور كان طوله قد إيه… الناس ضحكتها على وشوشها كأننا يوم العيد… عدد الناس اللي شفتها النهاردة اللي سنهم فوق الستين و السبعين خرافي… لما إتكلمت مع واحدة منهم قالتلي: “إحنا لو مانزلناش نبقى بنضيع اللي إنتو عملتوه”…

النهاردة بس أنا إتأكدت إن دم الشهداء ماراحش هدر…

لما فكرت مرة و إتنين و عشرة مالاقتش إلا إجابة واحدة لكل اللي شفته ده… وهي نفس الإجابة اللي كنا بنقولها للناس اللي كانوا بيسألونا إحنا بنعمل كدة ليه و إحنا بننضف شوارع قصر العيني و طلعت حرب تاني يوم التنحي…
البلد بقت بتاعتنا… لأول مرة في حياتنا بقت بتاعتنا بجد… لازم ننضفها…
لكن مش بس ننضف شوارعها… الأهم إننا ننضف أفكارنا و عقولنا وإتجاهتنا… نغير في نفسنا و في اللي حوالينا…
الطريق لسة طويل… لكن يستاهل…

أنا مبسوطة قوي قوي قوييي…

في قسم إتعمل في التليفزيون من فترة… لما شفته قشعرت… و لما قلته دموعي نزلت… و إنتهى بي المطاف إني طبعته و علقته في مكتبي… عشان يكون دايماً قدام عينايا… القسم بيقول:

“أقسم بالله العظيم…
أن أحافظ على مصر حرة مرفوعة الرأس…
و أن أخلص العمل بكل ضمير…
وأن أجتهد لتحقيق أحلامي…
وأن أحترم أحلام أولادي…
واثقاً في شمس مستقبل بلادي…
مؤمناً بوحدة شعبي…
مسئولاً عن كل حبة تراب من أرض وطني…
والله على ما أقول شهيد…”

يا رب… كل اللي حصل ماكانش هيكون من غيرك… كملها لمصر بالخير…

رحاب رجائي
في 19 مارس 2011
Advertisements

7 Comments »

  1. Rain said,

    الله يحفظ مصر و يقويها يا رب
    خليكم عهالطريق و انشالله مصر حتصير اشي عظيم

  2. u made my eyes wet with tears,, bgad 7aga tfara7 🙂
    msh 2adra awseflek e7sasyy enhrda wana ry7a ellagna, kont 7assa enny w7da tnyaa, bgd ana mabsootaaa awyyyyy :))

    isA tekmal 3la 5er.. a7l dam elshohada2 mara7sh hadar :’)

  3. Rou... said,

    يا رب… دعواتكم… عقبال كل بلاد العرب 🙂

  4. Rou... said,

    Yes ya Israa… exactly… this is the right word… 7aga teffarra7… 🙂
    Today we were writing history… just like we did in Tahrir… 3ashan Omar Soliman we Nazeef yeb2o yeego yeshoofo el sha3b elly lessa mesh mosta3ed lel demoqrateya da 3amal eih!

    I’m positive eno inshallah Rabena will bring the best for Masr… 🙂

  5. 3abkarino said,

    مصر بكرة احسن بينا كلنا
    فين لما كلمتى صديقك يوم الاستفتاء الصبح تسلمى عليه قبل مايسافر وتطمنى هوا صوت ولا لأ 🙂 وخسرتى مكالمة دولى
    مصر بكرة احسن بينا كلنا

  6. 3abkarino said,

    عندك اكونت تويتر ولا لأ؟؟؟

  7. Rou... said,

    أنا إزاي عدت مني أكتبها دي يا فتحي… معلش ملحوقة 🙂
    إنت ن الأسباب اللي كانت بتقوي إيماني بالبلد…

    و آه عندي تويتر… sleeplessrou


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: