April 13, 2011

القصاص.. القصاص

Posted in Arabic, Quotes, Reflections, Revolutionary and Politician, Slang at 11:55 pm by Rou...


أسبوع عجيييييييييييييب…

يوم 10/4/11 إنسحب المخلوع من لسانه وبعت بيان لقناة العربية… و ماتسألنيش إشمعنى العربية… يقول فيه إنه حزيييين و بيتألم من الإدعاءات الكاذبة اللي بتشوه صورته هو و مراته و المدعوئيين علاء و جمال… ضغطي علي لما سمعت البيان… تحديداً لما سمعت صوته و طريقة كلامه… فجأة حسيت إن الزمن رجع بيا لورا و بجد دمي غلي في عروقي… بس بعد شوية هديت وأنا بتفرج على ردود فعل الناس… الحقيقة إن الراجل ده بيعمل شغل عالي قوي مع الثورة من أول يوم… عنده قدرة عجيبة إنه يجمع الناس على كرهه… لكن ده ما يمنعش إننا طبعاً طبعاً لقينا شوية نزلوا جري على ميدان مصطفى محمود يعملوا واجبهم الوطني في فقع مرارتنا ويهتفوا لمبارك (الله يرحمك يا دكتور مصطفى.. آه لو كنت تعرف اللي هيحصل عند الجامع اللي إنت بنيته)… أنا كل أما أشوف الناس دي أفكر إننا لازم نلاقيلهم حل… ممكن نعمل فيهم زي اللي بيتعمل في اللي بيقول Heil Hitler في ألمانيا …

المهم… بعد الخطاب ده بتلت ساعة بالضبط النائب العام أمر باستدعاؤه للتحقيق هو وولاده… الراجل بخطابه حط الجيش و النائب العام في مزنق وقالهم تعالوا حاسبوني… طب مش إنت عملت فيها عشر رجالة في بعض…؟ تعالا بقة! بس طبعاً عشان “حالته الصحية” قاللك التحقيقات هتبقى في شرم الشيخ… ماشي!

تاني يوم التحقيقات كانت بدأت مع صفوت بيه “الشريف”… 13 ساعة من التحقيقات إنتهت ب 15 يوم حبس عشان يحصل رفيق الفساد زكريا عزمي اللي كان أخد 15 يوم قبلها بأيام و باقي الشلة “النظيفة” في سجن طرة…

إمبارح بقى بدأت التحقيقات مع آل مبارك… الأب و الإبنين… من غير سوزي… اللطيف إن كل الكلام الفارغ اللي مبارك قاله في الخطاب بتاعه اللي كان ناقص يقول فيه “فتشني فتش”… مالهوش أي لازمة… ليا على الأقل… لإن كلامه كان كله على الفلوس… كأن هي دي التهمة الوحيدة… ياخي ماتولع الفلوس… ده إنت في بلاوي مستنياك أقلها الفلوس!

المهم… أنا على بالليل كنت تعبت ودخلت أنام ومستنيتش أعرف نتيجة التحقيقات… صحيت الساعة واحدة صباحاً على تليفون من أخويا بيقوللي فيه أحلى خبر سمعته في حياتي…
آل مبارك أخدوا خمستاشر يوم سجن على ذمة التحقيق يا رجاااالة…

النهاردة الصبح الخبر كان في كل مكان…
جمال و علاء وصلوا طرة الصبح بعد ترحيلهم من شرم… أما حسني فاستموت في وسط التحقيقات و إتنقل المستشفى في شرم… و برده واخد ال 15 يوم لكن هيقضيهم في المستشفى…
على بعد الضهر عرفنا إن فتحي سرور حصلهم بخمستشارية كمان… و بعدهم مرتضى منصور…
وأخيراً الخبر غير المؤكد حتى الآن عن تحقيقات بدأت مع الحرباء سوزان و أخبار عن إستعدادات سجن النساء بالقناطر لإستقبالها…

لما تقف للحظة وتستوعب كل ده تحس إن التعبير المثالي لإحساسك هو: أثلج صدري…
الواحد من أول الثورة وهو عمال يشوف تفاسير حقيقية قدام عينيه لآيات ربنا… إحساسي المرة دي و أنا بسمع خبر آل مبارك تحديداً كان الآية دي: “ولا تحسبن الله غافلا عما يعمل الظالمون إنما يؤخرهم ليوم تشخص فيه الأبصار”…

أخويا حط الستيتس بتاعته على فيسبوك من شوية: “تعالوا نتخيل كتب التاريخ اللى هيدرسها أولادنا هتقول إيه على الحاكم المخلوع اللى حكم مصر 30 سنة… أعتقد الـ30 سنة دول هيختزلوا فى الآتى: “بعد اغتيال السادات حكم مصر شخص يدعى مبارك الذى تميز عهده بالفساد و الاستبداد و الفقر و التخلف التعليمى و الصحى و انهيار الاقتصاد و القيم الأخلاقية و استمر حكمه 30 عاما إلى أن قامت ثورة شعبية أطاحت به و زجت به فى السجن إلى أن مات داخله”…”

الله أعلم نتيجة التحقيقات هتكون إيه… لكن اللي أكيد إن اللي بيحصل اليومين دول لازم يكون عظة لينا كلنا…
واللي أنا عارفاه دلوقتي إني سعيدة جداً… سعادة من نوع مختلف… مش عارفة حتى أوصفها…
مش شماتة… ده قصاص… “ولكم في القصاص حياة يا أولي الألباب”…
يا كل شهيد… نام و ارتاح… حقك النهاردة بيرجعلك…

رحاب رجائي
قي 13 إبريل 2011
Advertisements

2 Comments »

  1. Mermaid said,

    Hahaha, ya mosiba enty 🙂 We call for democracy, thus, we need to tolerate those who say heil Hitler 🙂 Even if we cannot possibly understand what the hell they’re talking about! 🙂 Tolerance ya Rou 🙂

    You made me crack up laughing loudly @ “fateshny fatesh” 😀

    True: “ولكم في القصاص حياة يا أولي الألباب”

    Since this all started and I am praying: يا رب اكفينا شر السلطة والنفوذ

  2. Rou... said,

    Amen to that….
    as for the tolerance… I cannot promise you this 🙂


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: