May 7, 2011

مئة يوم

Posted in Arabic, Reflections, Revolutionary and Politician, Slang at 11:28 pm by Rou...

عدى 100 يوم على بداية الثورة…
كم الأحداث اللي حصلت… بداية بنزولنا الشوارع بالأعداد دي… و مروراً بالعنف و إنسحاب الشرطة و نزول الجيش و الحظر و موقعة الجمل و المليونيات في التحرير و التنحي و حكومتين و سقوط أمن الدولة و طوابير يوم الإستفتاء… ونهاية – حتى الآن – بحبس معظم رموز النظام على رأسهم مبارك شخصياً… كم الأحداث ده بيحسسني إن الثورة بقالها سنين مش 100 يوم…

من كام يوم يسري فودة إستضاف السباعي رئيس الطب الشرعي – واللي مايعرفش مين هو السباعي أفكره بالمتستر الرئيسي على كل كوارث النظام السابق من قتل و تعذيب و اللي قال إن خالد سعيد كان بالع لفافة بانجو – الراجل ده بكم المهازل اللي قالها في اللقاء بجانب طريقة كلامه اللي حسستني إنه بياع خضار في سوق لازم يحاكموه بتهمة الغباوة قبل التآمر و التزوير… المهم… وكأن يسري مكتوباله إنه كل ما يستضيف حد هزؤ بالشكل ده يقال، بالفعل بعدها بيومين تمت إقالة السباعي من منصبه…

أول إمبارح طلع أول حكم… 12 سنة سجن لحبيب العادلي أخدهم مبدئياً كدة في قضية التربح… لسة قتل المتظاهرين… يا مسهل يا رب…

أنا كل ما خبر من دول يتقال، بينزل عليا هدوء و سكينة و أحس إننا بنمشي لقدام خطوة… وأبتسم وأنا بتخيل إبتسامة خالد سعيد أو ضحكة في صورة شهيد…

لكن زي ما في أخبار تشرح القلب، في أخبار بتقبضه… زي قصة كاميليا شحاتة اللي مش عايزة تخلص مثلاً… أنا بجد محروق دمي جداً… ياخواننا حرام عليكم… ما تسلم و لا تتنصر… إحنا مالنا…؟ على رأي إبراهيم عيسى… لا الإسلام هيزيد بيها و لا المسيحية هتنقص منها…
كمان الأحداث اللي في إمبابة بقالها ساعات و ماحدش فاهم أسبابها… ساعات بحس إني هتجنن من اللي الناس بتعمله… ما هو أصل المصريين مش بالغباء ده… الشعب ده عنده وعي خرافي و كلنا لمسناه أيام الثورة الأولى… أمال إيه بقى…؟ فين الغلط…؟ بجد نفسي أحط إيدي عليه… مش لاقية كلام أقوله في الموضوع ده غير جملة وائل خليل على تويتر: “أهل إمبابة حايحموا كنيستها وأهل مصر حايحموا ثورتها ومش حاتشمت فينا يامبارك”…

ساعات بسأل نفسي هو أنا بكتب اللي بكتبه ده ليه… ولمين…
بس برجع أقول إني بسجل لنفسي ولأهلي و أصحابي… ويمكن في يوم من الأيام لولادي… الأحداث بتفاصيلها… عشان ماننساش…
لإننا ماينفعش ننسى… مش للإنتقام… لكن عشان بكرة يكون أحسن لازم ماننساش…

من فترة كنت كاتبة تساؤل على فيسبوك إن يا ترى عيد الثورة اللي جاي مصر هتكون شكلها إيه… كنت أقصد 25 يناير اللي جاي… لكن الكلام جاب بعضه و الحديث إتقلب بيني و بين صديق عزيز على ثورة 52 بحساناتها و سيئاتها… نقاش طويل إنتهى بنقطة واحدة…
إننا مش عايزيين بعد خمسين سنة ولادنا أو أحفادنا يقولولنا إنتوا ماحافظتوش على ثورتكم…
مش عايزين ثورة 25 يناير تتحول ل 23 يوليو تانية…

يا رب…
مش هقول حافظ لنا على ثورتنا…
هقول حافظ لنا على مصر…

رحاب رجائي
Advertisements

2 Comments »

  1. Lost and Found said,

    كلامك يا رو بيديني أمل ان المصريين واعيين لثورتهم و بلدهم..بس اللي مش قادر اتخيله ازاي الناس واثقة في المجلس العسكري..القادة دول من أكبر واحد لأصغر واحد فيهم اتربو و شربو و طلعو لمراكزهم دي عشان المخلوع سامحلهم بكده…تفتكرو طريقته في اختيار الوزراء و القيادات في الدولة تختلف عن طريقته في اختيار قيادات الجيش؟!!
    دول قيادات فاشلة و غارقانة فساد و كل الجيش عارف…واللي حصل انه مش هم اللي حموا الثورة بالعكس هما لو واثقين 1 في المية ان الضباط الصغيرين اللي في الشارع هينفذو أمر ضرب المتظاهرين كانو نسفو ميدان التحرير باللي فيه…لكنهم عارفين و متأكدين ان فيه انفصال تام بينهم و بين القيادات الصغيرة اللي في الجيش اللي شايلين السلاح.
    الفضل في حماية الثورة هم صغار الضباط مشش القتدة اللي اخترهم مبارك.
    طول ما المجلس ده في السلطة البلد هتفضل تتمزق بصراعات تافهة و غبية.

  2. Rou... said,

    Boss ya Rami… 7atta law kol da sa7… ana bashoof eno saf7et fasad el gesh lazem tefdal ma2foola for the time being… ana shayfa eno dee akher wara2a tetfete7…

    Ana shayfa eno benesma mesh battala fee wa3y… bas bardo fee nesba mesh 2olayela 3andohom 3adam wa3y bashe3…

    Rabena yostor


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: