May 16, 2011

عن النكبة و الزحف وسفارة إسرائيل

Posted in Arabic, Reflections, Revolutionary and Politician, Slang at 10:34 pm by Rou...

إمبارح كان ذكرى النكبة و قيام الكيان الصهيوني كاملاً على أرض فلسطين…
من أسابيع كان في حشد على صفحات فيسبوك لما أطلق عليه يوم الزحف من دول المواجهة في إتجاه إسرائيل… مش عشان يعبروا الحدود و لكن عشان يسبتوا موقف إنهم يقدروا يعملوا كدة… حصل عنف كتير على الحدود مع سوريا و لبنان… و كرد فعل قامت مظاهرات كبيرة عند مبنى سفارة إسرائيل في مصر…

مبدئياً كدة أنا ضد الزحف…
و كمان ضد المظاهرات عند سفارة إسرائيل ومحاولة إقتحامها…
لإن ببساطة – وأنا عارفة إن كتير مش هيعجبهم كلامي – مش وقته…
لإن عشان تقدر ترجع حقوق برة لازم تقف الأول على رجليك جوة…
يعني من الآخر ماينفعش نفتح على نفسنا الفتحة دي و إحنا في الظروف دي…

لكن ده في جنب و اللي حصل بالليل قدام السفارة من الجيش و الشرطة في جنب تاني خالص… إننا نرجع من تاني للتعامل مع التظاهرات بالعنف والقنابل و الرصاص… لأ و ألف لأ…

إلتزام الدولة بالدفاع عن السفارة مفهوم، ولكن إستخدام العنف غير مقبول بالمرة…
ضرب مصري بالرصاص دفاعاً عن علم إسرائيل ماينفعش مهما كانت المبررات…
في ألف طريقة و طريقة يحموا بيها السفارة و يفضوا بيها المظاهرة و الإعتصام من غير عنف…
شهود العيان قالوا إن اللي حصل إمبارح كان سيناريو مكرر ليوم 28 يناير…
وبعدين والجيش و الشرطة اللي ماظهروش ساعة كارثة أحداث إمبابة ووقفوا يتفرجوا على ولاد البلد الواحدة و هم بيدبحوا في بعض… إشمعنى عملوا فيها دلوقتي عشر رجالة في بعض؟؟؟
ما ده خراب و ده خراب… و لا عشان دي إسرائيل…!!!
وبعدين إيه التعتيم الإعلامي البشع ده… الأخبار كانت في كل مكان على تويتر و كل البرامج الحوارية في التلفزيون في عالم تاني…
هو إحنا بنرجع لورا و لا بنمشي لقدام…؟!

في جملة إنتشرت على فيسبوك و تويتر بتقول: “أصبحت علاقة الشعب بالجيش زي الست اللي عارفة إن جوزها بيخونها بس مش عايزة تخرب البيت”
أنا مش موافقة على الكلام ده حرفياً عشان أنا مش بخون الجيش… لكن الواضح والأكيد دلوقتي بالتجربة إنهم بيتصرفوا بغباء لما بيكونوا تحت ضغط…

أنا مخنوقة جداً… و خايفة جداً جداً…
ومش عارفة إذا كان الصح فعلاً إننا ننزل في ثورة تانية زي ما الدعوات على فيسبوك بتطالب و لا نستنى شوية كمان…
بس… هنستنى إيه… الثورة بتتسرق مننا… ومصر رجعت تنادي علينا…

يا رب… إنت أعلم مننا… وصلنا للطريق الصح…

في 16 مايو 2011
Advertisements

2 Comments »

  1. Lost&Found said,

    Rou…the answer to your question is yes for sure…i have absolutely no trust in the military council..they are Mubarak’s associates from the start…who can anyone trust them…military council is not the army.Don’t ever trust them,they were raised and got these positions by kissing Mubarak’s hands.they are the same as sorour,safwat,zakaria and all the other gang member.

  2. Lost&Found said,

    الشمس مكسوفة (مصر) عريسها (الشهيد) جىّ قمر منوَّر في السما طالع.. خرج لها راح ومش راجع.. بينه وبينها حُب مالوش زىّ! جايب معاه هدية لمنسية


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: