July 22, 2011

عن شارع المعز وشماعة الثورة

Posted in Arabic, Places, Reflections, Slang at 10:50 pm by Rou...

إمبارح كنت بحضر ندوة في وكالة الخروب… للي ما يعرفش، وكالة الخروب في شارع متفرع من شارع المعز ما بين جامع الأقمر و بيت السحيمي… ويا ريتني ما رحت… مش عشان الندوة… الندوة كانت أكتر من رائعة كعادة صديقي العزيز جداً و أبي الروحي محمد الرزاز… ولكن يا ريتني ما رحت لأن دي كانت أول مرة أروح شارع المعز من شهور وصدمتي في اللي شفته كانت أكبر من قدرتي على الإستيعاب…

شارع المعز من أحب الأماكن لقلبي… يمكن لأنه كان من أوائل أماكن القاهرة الإسلامية اللي حضرت فيها جولات من أوائل 2004 ومن بعدها عملت فيه جولات لأصدقاء… يمكن لأني ياما مشيت الجزء الشمالي منه قبل الترميمات الأخيرة و ياما مشيت في وسط تلال من الأتربة والحفر أثناء الترميمات واللي لما أخيراً خلص وتمت إضاءته بالشكل الرائع ده في 2008 وإتحول لشارع مشاة فقط، كنت هطير من السعادة وكنت في إنتظار حار إن الجزء الجنوبي منه وأماكن تانية في القاهرة الإسلامية زي شارع الصليبة والسيوفية و صحراء المماليك وغيرهم يبتدي الإهتمام بيهم كمان…


لكن الحقيقة إن إمبارح أنا ماكنتش في شارع المعز… إمبارح أنا كنت ماشية في سويقة…

عربيات من الإتجاهين قافلين الشارع وكلاكسات وموتوسيكلات وعربيات بضاعة راكنة وناس مش عارفة تمشي خطوتين على رجلها… منظر أسوأ من اللي كان فيه الشارع زمان قبل الترميمات… مهزلة بكل المقاييس…
آخر شئ في الدنيا كان ممكن أتوقعه أو أستناه، إني أشوف اللي أنا شفته ده بعد الثورة…

المشكلة كمان إن الناس مش حاسة إن في حاجة غلط… وعدم الإحساس بالغلط ده في حد ذاته كارثة يمكن تكون أكبر حتى من الغلط نفسه… واللي يضايق كمان لما تسمع تعليقات زي: “هو ده اللي خدناه من الثورة”… ولما ترد تقول إن الغلط مش بس من الناس اللي دخلت بعربياتها ولكنه كمان من الأمن اللي ساب مدخل باب الفتوح اللي كان ممنوع دخول العربيات منه مفتوح، يردوا يقولولك: “مش هو ده اللي كنتوا عايزينه… هو ولا تدخل الشرطة عاجب ولا لما سابوهالكوا عاجب؟”…

أنا فعلاً مش عارفة إيه الحل… مش قصدي بس حل لشارع المعز… ولكن كمان حل للناس… لطريقة تفكيرهم وبحثهم الدائم على شماعة يعلقوا عليها غلطهم…
هل الناس مش حاسة إن دي حاجتهم فبيهملوها…؟ طيب لو هي كدة، إيه اللي ممكن نعمله عشان نزرع جوة الناس إحساسهم بملكيتهم للمكان فيحافظوا عليه…؟ هل ننزل في حملات تشرح تاريخ المكان مثلاً لقاطنيه…؟
لكن التعدي الصارخ على المكان ماكانش بس من أصحاب المحلات بعربياتهم أو اللي ساكنين هناك بموتسيكلاتهم… كان كمان من ناس جاية تزور المكان…

يا ريت لو أي حد عنده إقتراح للي ممكن نعمله إحنا كأشخاص، غير إننا نحاول نوصل الموضوع للإعلام، يقول…
خلينا نفكر مع بعض بطريقة إيجابية… عشان أنا لسة مؤمنة إن بكرة أحلى… بينا…

في 22 يوليو 2011
Advertisements

1 Comment »


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: