December 21, 2011

بنات مصر خط أحمر

Posted in Arabic, Books - Fav. Selections, Quotes, Reflections, Revolutionary and Politician, Slang at 3:52 am by Rou...

لسة راجعة من واحدة من أجمل المسيرات اللي مشيت فيها من أول الثورة…
سميها زي ما تسميها… مسيرة سيدات مصر… مسيرة البنت اللي عرت المجلس… في النهاية هي مسيرة شرف في وجه عديمي الشرف… وهي في إعتقادي صفعة على وجه مجلس العار اللي حاول يخوف النساء من النزول ببهدلتهن وسحلهن وإهانتهن باللفظ والفعل، فكان الرد أكبر مسيرة نسائية تشهدها مصر من أيام سعد باشا…
أكتر من عشرة آلاف سيدة في طوق عملاق من الرجال الشرفاء اللي عندهم نخوة محيط بيهم و بيحميهم في مسيرة لفت من التحرير لطلعت حرب لشارع رمسيس مرورا بنقابة الصحفيين وقصر النيل وعودة مرة تانية للميدان…
زي ما حسام عيد كتب على تويتر: “اليوم تسجل “نون” النسوة انتصاراً أمام “شرف” العسكرية… لم عارك يا مجلس العرر…”

أنا ماكنتش في القاهرة لما أحداث قصر العيني بدأت، كنت في إسكندرية… أول مرة أحس بمشاعر الناس اللي برة مصر وقت الثورة… أنا كان هيحصلي حاجة وأنا على بعد ساعتين بالقطر لمجرد إحساسي إني مش عارفة أكون معاهم… ما بين تويتر وأصدقائي على التليفون… أعصابي إنهارت… لما كلموني من جنازة الشيخ عماد عفت من الأزهر كان قلبي بيتنفض في مكانه من الهتافات… ولما شفت الصورة اللي أصبحت الصفحة الأولى لكل جرائد العالم – ما عدا صحافتنا المبجلة (اللهم إلا جريدة التحرير)- كان جوايا مزيج بشع من العجز والقهر والغضب…

الغريب في الأمر إن بعد كل ده لسة في ناس تجد المبررات قدام نفسها عشان ترضي ضميرها وتلاقي حجج تخفي بيها عورات جبنها وخنوعها… فتلاقي تعليقات فجأة تقولك… وهي إيه اللي نزلها أصلاً من بيتها… ما هو أصل لو كنت إنت راجل ماكانتش هي نزلت يا عار الرجال وبعدين قبل ما تتكلم روح شوف تاريخك وتاريخ النساء فيه ومواقفهن… ولا الفكيك اللي يقوللك هي إزاي في البرد ده مش لابسة حاجة تحت العباية… وإزاي لابسة عباية بكباسين (أيوة الله كباسين)… كباسيييين… نهاركم إسود… إنت عملت زووم ولا إيه مش فاهمة… وبعدين ما تلبس اللي تلبسه… هي محتاجة تبرر كمان بتلبس إيه تحت هدومها يا أوباش!
فعلاً الأشكال دي بجد فهمتني معنى جملة:”اللهم أرنا الحق حقاً”… أصل في ناس ربنا بيعمي قلوبهم مش بس عينيهم…
يومها بلال فضل كتب: “لا أحد يطلب منكم أن تكونوا ثوارا أو مندفعين أو مستبيعين. نطلب منكم أن تكونوا آدميين يهزكم الدم وتنتفضون للنساء المهانات. هل هذا كثير؟”… بس أقول إيه… خليكم ساكتين… إمبارح رموا أخواتكم في الزبالة… النهاردة هتكوا عرض نساءكم… خليكم ساكت… يومكم هييجي أكيد…

وبعدين مش قادرة أفهم… هل فعلاً لسة في ناس مؤتمنة المجلس العسكري على مصر…؟ دول من فشل للتاني… حتى طرق حلهم للأزمات مضحكة… ما هو شر البلية ما يضحك… يعني أزمة السفارة الإسرائيلية .. سور… أزمة محمد محمود… سور… أزمة مجلس الوزراء… سور… أزمة قصر العيني… سور… تحس إنهم بيطبقوا حرفيا قوله تعالي: “لا يقاتلونكم جميعا إلا في قرى محصنة أو من وراء جدر”…
ناس بتسحل وتهين وتقتل وتروع… يؤتمنوا على وطن…؟ ده كفاية جملة اللواء عبدالمنعم كاطو لما قال إن الإعلام بيحمى المجرمين (اللي هم إحنا)… و«كيف تتعاطفون مع عيال صايعة يجب إحراقهم في أفران هتلر»؟ أفران هتلر!!! يخرب بيتك!!! يا ترى سيادة اللواء عنده فكرة إن في ألمانيا ذات نفسها جملة زي دي يتسجن بيها…؟
بس أرجع وأقول من تاني… ماهو لو كان في حد اتحاسب على قتل الثوار في يناير ماكانش في كلب قدر يمد إيدوا النهاردة! المجلس مش لازم يرحل… ده لازم يتحاكم ويتعدم… ماعادش ينفع ترجعوا ثكناتكم من غير حساب ومحاكمات… بينا وبينكم دم سال وشرف إنتهكتوه…

وآل إمبارح عامليين مؤتمر عاااار زيهم وماكلفوش خاطرهم لحظة يجيبوا سيرة التعدي على السيدات… والنهاردة طالع في بيان يأسف لما حدث لسيدات مصر… يأسف على إيه ولا إيه ولا إييييه…..؟!
ولا الجنزوري اللي طلع يخرف ويتكلم عن مشاريع تعميير سيناء… سيناااا إيييييه الناس بتمووووت!!!
وعلى سيرة الجنزوري… النهاردة أصدقائي من حملة عمرو أخويا (بعد النتيجة قررنا نستثمر التوافق اللي بينا في خدمة مجتمعية) كانوا في عزبة الهجانة، وعلى لسان صديقتي فاطمة: “واحد من شباب الهجانة قال جملة رائعة جداً تعليقاً على الجنزورى لما قال: هو فى ثائر عمرة 12 و 13 سنة…؟ الولد اللى تعليمه على قده و ممكن نعتبر إن ثقافته محدوده لو مكنتش معدومه قال: هو حب البلد و الوطنية ليهم سن…؟! عنده حق و رده أبلغ من أى عالم أو دكتور على كلام التحفة اللى جتلنا على آخر الزمن… تحية الى الشاب و تحية إلى أهالى العشوائيات و لا عزاء للمومياءات…”

المفكر والعلامة السوري عبد الرحمن الكواكبي ليه جملة بتوصف المشهد ده بالضبط في كتابه طبائع الإستبداد ومصارع الإستعباد بتفول: ” الاستبداد يقلب الحقائق فى الأذهان، فيسوق الناس إلى إعتقاد أن طالب الحقِّ فاجرٌ، وتارك حقّه مطيع، والمشتكي المتظلِّم مفسد، والنّبيه المدقق ملحد، والخامل المسكين صالح أمين، ويُصبح – كذلك – النُّصْح فضولاً، و الغيرة عداوة، والشّهامة عتوًّا، والحمية حماقة، والرحمة مرضاً، كما يعتبر أنَّ النِّفاق سياسة، والتحيُّل كياسة، والدناءة لطف، والنذالة دماثة.”… صدقت!

يوم السبت اللي فات دخلت شارع جانب الفندق في إسكندرية بالصدفة… ببص على إسمه لقيت اللوحة مكتوب فيها شارع الشهيد خالد سعيد… ماكنتش أعرف إن في شارع بإسمه فسألت واحد في محل قاللي أيوة هو كان ساكن هنا وأهله لسة ساكنين هنا… والسايبر اللي حصل فيه كل ده قدام شوية… سبته ومشيت في الشارع شوية ووقفت قدام السايبر وعقلي عاجز عن التفكير… كنت حاسة إني محرجة أمشي في الشارع عادي كدة… مكسوفة من نفسي… كنت حاسة إنه موجود حواليا… بيعاتبني… بس بيقوللي برضه إنه مش قلقان ومتأكد إننا هنجيب له حقه…
وأنا خارجة من الشارع بصيت من تاني على اللوحة اللي بتحمل إسمه… ومن قلبي وشوشته… إدعي لمصر يا خالد… يمكن من عندك الدعوة تستجاب…

يا بنت ياللي عريتي المجلس ورجال الجيش المصري العظيم اللي فاكرين نفسهم رجالة وهم أبعد ما يكونوا عنها… إرفعي راسك.. ضفرك أشرف م اللي داسك…

يا مجلس العار… الدم مش ببلاش… وهتشوفوا… خليكم فاكرين…

أما بالنسبة للمتأسلمين بتوع أختي كاميليا وأختي عبير اللي ماتهزلهمش طرف من صورة البنت اللي إتسحلت وإتعرت قدام عينيهم وهم اللي كانوا بيولوا من شهر لما واحدة قلعت هدومها بمزاجها وإتصورت، فأنا حقيقي ممكن يجيلي غثيان لو إتكلمت عنكم… لكن عشان أريح ضميري، أنصحكم بالبحث عن تفسير الإسلام لكلمة “ديوث”… أوعدكم إنكم هتلاقوا صورتكم جنبها…

في ال 18 يوم الأوائل في الثورة، كنت كتير بتمنى لو كنت راجل عشان أقدر جسدياً أتحمل أكتر…
في شهر مارس، في يوم المرأة العالمي، كنت كتبت أقول إني سعيدة جداً إني شاركت في الثورة كأنثى لأني حاسة إني عملت فرق زي مانا كدة… النهاردة أنا مش بس سعيدة… أنا فخورة بنفسي وبكل بنت وست وأم وزوجة نزلت عشان تصرخ بأعلى حس ليها وتقولها على الملأ…

بنات مصر وسيداتها خط أحمر يا أنصاف الرجال…
ويسقط يسقط حكم العسكر…

رحاب رجائي
في 20 ديسمبر 2011
Advertisements

6 Comments »

  1. Marwa Shokr said,

    as usual proud of you .. allah yosnsorek ya shei7’a .. i expressed what makes pain inside me .. i can’t hold tears , i felt like screaming with ur letters !! luv u rou

    • Rou... said,

      🙂 Rabena yekhaleeky ya Marwa… I never told you 3ala fekra that I am very proud of your way of raising Omar… He will be ragel! mesh noss ragel!

      Thank you for being my friend 🙂

  2. Mariam Ramsis said,

    WOW!!! Gamila Gidan

    • Rou... said,

      Glad you liked it 🙂

  3. Mermaid said,

    That’s a combo post 🙂

    ماهو لو كان في حد اتحاسب على قتل الثوار في يناير ماكانش في كلب قدر يمد إيدوا النهاردة!

    Very true! I was just quoting you on this to mom yesterday and she completely agreed with the statement.

    دول من فشل للتاني

    I think it is not failure per se. When someone fails, once, we call it failure. But when someone fails repeatedly in dealing with the very same situation (people on strike) then it is not failure. It is more of stupidity ma3a sabq el esrar wal tarasod and determination on failing through repeating past failures!

    Did you see in the press conference they held when that lady starting CRYING on el magma3 el 3elmy, Emara told her: la2, argooky stop crying 3ashan ana mesh ha3raf agaweb keda. I was like…. YA 7ENAYEN!!!!

    أختي كاميليا وأختي عبير

    For some reason I visualised you saying it: okhtchy Camilia and okhchy Abeer 🙂 🙂 🙂

    Like the post very much ya Rou. A great personalised documentation of the events. Chapeau ya bent 🙂

    • Rou... said,

      Thanks ya Mayo 🙂

      I so much agree with your comment on repeating same failures over and over again, even though I don’t see them stupid, but rather… motakabereen… el kebr ye3mel fel bany adam aktar men keda…

      About the press conference… yes, saw this… we kaman the way he was talking with the attendees… te7essy eno he was in a classroom for some teenagers… law etkalemt haetla3 barra… beroo7 ommo ya3ny!

      Anyways… thanks again ya folla 🙂


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: